ჩვენ მიერ 2011 წელს დაარსებული მარნის ისტორია, ვაზისა და ქართული მეღვინეობის მემკვიდრეობის პატივსცემით არის ნასაზრდოები. ძველი ვენახი 2010 წელს შევიძინეთ. 0,84 ჰექტარზე 1970 წელს გაშენებული რქაწითლისა და საფერავის ჯიშის ვაზი არასახარბიელო მდგომარეობაში იმყოფებოდა, ვაზი იყო ბებერი, ფორმირება დაკარგული და საკმაოდ მეჩხერი. ამგვარი მოცემულობის გამო, გამოცდილმა მევენახეებმა მირჩიეს ბებერი ვაზის ამოძირკვა და ახალი ვენახის გაშენება, თუმცა მასში, რაც სხვებისთვის წარსულის ნანგრევებთან ასოცირდებოდა, მე ცხოვრებისეული გამოცდილებით ნასაზრდოები, დიდი პოტენციალი დავინახე. 

მალე ვაზმა საკუთარი რეალური შესაძლებლობებიც გამოავლინა. მრავალწლიანი ერთგულების, სათუთი მოვლისა და ბუნებრივი რიტმის ხელშეწყობით, ვენახი ხელახლა დაიბადა. ჯილდოდ კი, უბადლო არომატის საუკეთესო ღვინო მივიღეთ, რაც თავად ვაზის მხრიდან, მადლიერების ერთგვარი გამოვლინება იყო. პატივისცემის ნიშნად, სწორედ ეს ბებერი ვაზია გამოსახული ,,არჩილის ღვინის” ეტიკეტზე.

ბებერი ვანახის შეძენის შემდეგ შევიძინე მეზობლად არსებული ნაკვეთები და მასზე გავაშენე საფერავის და ქისის ჯიშის ვენახი. ამ ვენახებიდან მოყვანილმა ყურძენმა საუკეთესო ღვინის შექმნის შესაძლებლობა მოგვცა.

ღვინის წარმოებისთვის, საკუთარი ვენახიდან მოყვანილი ყურძნის გარდა, ვიყენებთ წინასწარ შერჩეული ვენახებიდან კახური მწვანესა და კაბერნე სოვინიონის ჯიშის ყურძენს. შერჩევამდე მათი მოვლის თავისებურებებს ვაკვირდებით , რათა უზრუნველვყოთ სასურველი ხარისხი.