საქართველოს ტექნიკურ უნივერსიტეტში მივიღე განათლება სამადუღრო წარმოების ტექნოლოგის სპეციალობით. მჯერა, რომ ხარისხიანი ღვინის შექმნის საფუძველი ვენახის მოვლის სწორი მიდგომაა. განსაკუთრებით მნიშვნელოვანია, როდესაც მეღვინე თავად განსაზღვრავს ვენახის მოვლის სტრატეგიას და მოსავლის აღების დროის ოპტიმალურ პერიოდს.

2010 წელს სოფელ კურდღელაურში შევიძინე ვენახი, ხოლო 2011 წელს დავაფუძნე მეღვინეობა „თელავის ძველი მარანი“. ჩემი მიზანი იყო და კვლავ რჩება ისეთი ქართული ღვინის შექმნა, რომელიც არა მხოლოდ საქართველოში, არამედ მის საზღვრებს გარეთაც აღიარებული იქნება.

პირველი შემფასებლები ჩემი ოჯახის წევრები და მეგობრები იყვნენ. ღვინის მაღაზიებში გაყიდვის შემდეგ, ის უფრო პოპულარული გახდა. მომხმარებლები ხშირად მადლობას მიხდიან ასეთი საუცხოო ღვინის შექმნისთვის. ყოფილა შემთხვევა, როცა საქართველოს საზღვრებს გარედანაც შეუტყობინებიათ, რომ ჩემმა ღვინომ უცხოელი ღვინის მოყვარულები და ექსპერტები აღაფრთოვანა.

ყოველ ასეთ ჯერზე მეამაყება, რომ „ქართულმა“ კიდევ ერთხელ გაითქვა სახელი საქართველოს საზღვრებს გარეთ. ეს ჩემთვის აღუწერელი სიხარული, უდიდესი ჯილდო და ახალი ძალის მომცემია.